فقط..للخريجين الجدد: استلم عربيتك

الف مبروك نجاحك واجتيازك لمرحلة صعبة. واهلا بيك في ..

"مرحلـــة خريجـــين "

احلى واصعب فترات العمر

حلوة
لان فيها احلى واكبر القرارات اللي ممكن تسعدك طول العمر، فيها الحرية في القرار والتحرك، فيها الجديد والجميل
وصعبة
لان الغلطه فيها بتكلفك كتير، والفوز فيها محتاج وقت، ومجهود كبييييير.

ولانك صاحب القرار تقدر تبدأ رحلة النجاح او الفشل الان

استلم عربيتك(حياتك) الان

كل خريج سواء اراد ام لا بيستلم عربية حياته بمجرد تخرجه
- في اللي بيركنها، او يخبط ويتعلم فيها.او من الفرحة يجري بيها في اي طريق شكله حلو ويكتشف في الاخر انه راح مكان غلط (فلوس، شهرة ...)حاجات من اللي بتضيع مع الزمن
- وفيه المسيحي الناجح اللي بيستملها بشكر وفرح وعارف اسمى هدف عايز يوصله"ملكوت الله"
طريق طويل هتمشيه. هتقابل ناس اشكال والوان، هتعدي طرق ومنحنيات صعبة، وطرق تانيه مزروعة ومرصوفة و ممتعة. بس المهم تبقى عارف سكتك كويس.

وعشان توصل صح لازم تحافظ على توازنك بين
8 حاجات. لو واحده وقعت بتخسر كتير

1- نظرة واحدة على الخريطة ما تنفعش.
لازم تقعد كل يوم مع المدرب والقائد الاعظم(المسيح) تسمع(نقده، تشجيعه، توجيهه). هو وحده اللي عارف الطريق الافضل ويقدر يقودك لهناك

2- وعلى اد ما هتاخد لازم تدي "محبة ومساعدة للاخرين"
- افتكر انك مش لوحدك على الطريق(الحياة). ساعد اخواتك وراعيهم. اخدمهم بحب يمكن ده هيكلفك وقت، مجهود، فلوس. لكن وعد: هتلاقي السعادة الاكتر في العطاء.

3- مد ايدك واشتغل ... الشغل متعب لكن ضروري..
- فبولس الرسول "اللي كان بيشتغل خيام" يقول للمؤمنين
"...ان كان احد لا يريد ان يشتغل فلا ياكل ايضا.. لاننا نسمع ان قوما يسلكون بينكم بلا ترتيب لا يشتغلون شيئا بل هم فضوليون." 2تس 3: 8
- ويقول الحكيم "لا تحب النوم لئلا تفتقر. افتح عينيك تشبع خبزا" أم 20: 13 فاشتغل باجتهاد وخليك نافع"جــدا" لمكان عملك.

4- استخدم الفلوس صح، ما تخليشهاش تستخدمك.
مهم أنك تزود مواردك، لكن الاهم انك تتعلم ازاي تصرفها صح بالطريقة اللي توصلك لهدفك اكتر(بناء ملكوت الله)

5- صون عربيتك"صحتك" باستمرار

واوعى الرغبة في الوصول السريع (خدمة كتير، عمل كتير ...) توقع عجلاتك فمتعرفش تكمل

6- الريست مهم ..
ريح اعصابك، خد نفسك ... عشان تكمل بقوة اكتر ..يمكن مش هدفك الريست لكن من غيره خطورة الطريق بتذيد

7- ما تسافرش لوحدك ..
اسره حلوه معاك هتــهـون كتير..دردش معاهم اسمعهم اخدمهم...ان كنت بتخدم خواتك اللي بره العربية .. عيلتك اللي جوه مش اقل

8- اوعى تنسى تمون بانتظام ...
واوعى تفكر ان الوقت او الفلوس اللي في البنزينه "عطله" ده من غيرها عربيتك هتقف ومش هتكمل
اقرأ دايما، خد الكورسات اللازمة، ادرس الكتاب...املا ذهنك وفكرك بالجديد والمفيد

واخيرا:
- ما تنساش كل الحاجات اللي فاتت مهمة جدا (سمع المدرب، صيانة العربية، البنزينه، الريست، ......) لكن ولا وحده تنفع تكون هدف .. لكن استخدم كل حلجة فيهم بتوازن عشان توصل لهدفك (ملكوت الله الكامل على حياتك، ومن حولك)
- لحد لما توصل وتسمع: نعم ايها العبد الصالح والامين ...

اجتماع خريجين

بيتر عوض